Hoxe, 18 de outubro, celébrase o Día das Escritoras 2021, unha iniciativa impulsada pola Biblioteca Nacional de España para visibilizar o papel das mulleres escritoras ao longo da historia, que este ano alcanza xa a súa sexta edición, baixo o lema “Ler as idades da vida”.
Con este motivo, a Biblioteca Escolar do IES Lamas de Castelo, a Libraría Chorima e o Concello de Carnota convocamos o I Concurso Escolar de Microrrelatos Día das Escritoras, dirixido ao alumnado dos centros de ensino do municipio.
O xurado do concurso, integrado por candansúa representante do IES Lamas de Castelo, da Libraría Chorima e mais do Concello de Carnota, deu a coñecer na data de hoxe os catro microrrelatos premiados, escollidos entre os corenta e un textos presentados.
As escritoras e escritores galardoados recibirán como premio un lector de libros electrónicos, un libro en formato impreso e mais un lote de material escolar. Ademais, todo o alumnado que concorreu ao concurso terá un agasallo sorpresa, como premio á participación. A entrega de premios terá lugar nos próximos días, nos propios centros escolares, previo acordo con estes.
Agradecemos inmensamente o traballo da rapazada e mais a implicación dos centros de ensino neste proxecto, ao que lle desexamos continuidade en edicións vindeiras.
A continuación, revélanse os traballos premiados e a identidade das súas autoras e autores.
Categoría A (1º, 2º e 3º de Educación Primaria):
“Un día, a trinta ves que eu cumplía sete anos…”, de Martiño Beiro Vázquez, 2º de EP do CEIP Plurilingüe de Carnota.
Categoría B (4º, 5º e 6º de Educación Primaria):
“A vida de Manolo”, de Paula Lago Trillo, 4º de EP do CEIP Plurilingüe de Carnota.
Categoría C (1º e 2º de ESO):
“Eu”, de Raúl París Novo, 2º de ESO do IES Lamas de Castelo.
Categoría D (3º e 4º de ESO)
“A vida nun instante”, de Mª José Kiernan Pita da Veiga, 3º de ESO, IES Lamas de Castelo, Carnota
Parabéns!
