Volven as Noites espectaculares a Carnota para amenizar as tardiñas deste outono. Este ciclo vai dirixido ao público adolescente e adulto. Co foco no teatro, estas actuacións -que organiza o Concello e forman parte do programa da Rede Cultural da Deputación da Coruña– terán lugar no salón de actos do Concello. Así mesmo, a entrada é libre até completar o aforo do salón.

Imos pola segunda edición,  e estas son as propostas deste ano:

O Furancho (domingo, 27 de outubro ás 19:00 h)

Inauguramos o ciclo con esta produción de Ibuprofeno Teatro, protagonizada por Marián Bañobre e Isabel Risco.  

Sinopse

As protagonistas, sempre na vangarda do deseño e das últimas tendencias, preséntannos O furancho. A súa nova aposta empresarial que cheira a éxito, a pesar do incerto destes tempos. Nel pódese consumir o excedente de viño, sinónimo de humor, e gozar dun espazo de complicidade para empaparse coa máis pura comedia hilarante.

E para quen non sexa de moito beber alcohol, no noso Furancho Spa resort vitivinícola Rosalía de Castro ofrecemos tratamentos de beleza e saúde baseados na viñoterapia. O corpo humano é unha parra que se expande. Cada célula é unha uva que nos flúe por dentro. Nós cruzamos as sementes das cepas máis exquisitas para atopar a combinación perfecta que che aporte relax e benestar. Todo sen química, nin sulfitos. Ecolóxico 100%.

Tres vellas (polo menos) – venres, 8 de novembro ás 21:00 h

Último espectáculo dos xeniais narradores Celso Fernández Sanmartín, José Luis Gutiérrez “Guti” e Quico Cadaval (Producións Teatrais Excéntricas).  

Sinopse
No repertorio de todos tres, hai muitos contos que foron contados por vellas, a quen llos contaron outras vellas. Unha progresión xeométrica de vellas. Nunca se coñeceron as vellas de Guti, Quico ou Celso, mais poderian manter unha conversa entre si á luz do carburo ou sobre o hule das cociñas aldeás. Moitas veces, as sesións de contos son sesións de espiritismo, e as vellas aparecen na axuda do narrador que se perdeu nun chiste, ou nun comentario de actualidade, e faino voltar ao rego do relato.
As vellas que depositan neles ensalmos, historias e receitas, pediron e lograron un lugar na escena, por iso este espectáculo mutante preséntase como TRES VELLAS (polo menos).
 
Ao rematar, os/as espectadores/as, coa boca encharcada, sairán a soñar co prato fumegante da memoria.

Go on! (venres, 13 de decembro ás 21:00 h)

Pechamos o ciclo coa actuación de Xoque Carbajal e Jouse García (Malasombra Producións) con “GO ON!” unha «odisea cómica no espacio galego».

Sinopse

Logo da chegada do home á lúa á humanidade só lle faltaba un reto: a chegada do home a Galicia. No ano 2010 (ano 25 despois de Gayoso), dous intrépidos exploradores tiveron o valor de adentrarse nas descoñecidas terras galaicas a través da ruta xacobea.  
 

“GO ON!” recopila esta experiencia límite que deixa aos do “Al filo de lo imposible” como simples boyscouts.

“GO ON!” é un completo folleto turístico que servirá para que outros ousados viaxeiros saiban como conseguir alimento nas festas gastronómicas ou como cantarlle unha saeta á Santa Compaña.

“GO ON! é unha guía de primeiros auxilios con recomendación necesarias como que facer logo de ser salvaxemente agredido por un toxo ou que facer logo de limparse o cú con ortigas.

“GO ON!” é a conferencia que percorre o mundo dende Burgos a Arkansas desvelando os misterios máis íntimos de Galicia e os seus habitantes, como cal é a orixe da frase “non me toques os suevos”, cada canto tempo cambian as sábanas os da Santa Compaña, ou cal é a resposta definitiva para a pregunta: “Que din os rumorosos?”