O galardoado vídeo turístico do concello poderá verse no certame francés
Logo de formar parte da Sección Oficial de varios certames internacionais, como os The Golden City Gate Awards ou o festival de Terres, o vídeo turístico e institucional do Concello de Carnota poderá verse este mes no marco dos Deauville Green Awards. Este certame vense celebrando dende o ano 2012 co obxectivo de poñer en valor as producións audiovisuais que promoven a sostibilidade, o coidado medioambiental e o turismo responsable. Este ano o festival contará con 420 obras en competición chegadas de máis 30 países. Ademais da proxección das obras, a sétima edición do certame normando contará con mesas redondas de expertos, masterclasses e sesións de pitching nas que se espera que participen cerca de 400 profesionais do sector.
Entre os días 19 e 20 de xuño de 2018 ‘O Legado’ de Carnota poderá verse no Media Centre dos Deauville Green Awards, fóra de competición, e tamén estará incluído no catálogo oficial do festival.
